काठमाडौं । अस्ट्रेलियामा रहेका नेपालीले देशमा हालैको बाढीपहिरोपीडितलाई राहत सहयोग गरेको छ । गैरआवासीय नेपाली संघ (एनआरएनए) अस्ट्रेलियाले ४१ हजार ९३ अस्ट्रेलियन डलर अर्थात् करिब ४५ लाख १२ हजार ७३९ रुपैयाँ प्रधानमन्त्री दैवी प्रकोप उद्धार कोषमा हस्तान्तरण गरेको हो ।
सहयोग रकम जुटाउनमा विभिन्न नेपाली समुदाय तथा संघसंस्थासँगको सहकार्यमा अस्ट्रेलियाका विभिन्न राज्यमा रहेका नेपालीसँगै नेपालका शुभेच्छुक, व्यवसायी, सामाजिक संस्था र अरू व्यक्तिको सहभागिता छ ।
संघका अनुसार, ३४८ दान प्राप्त भएका थिए । सानोठूलो रकमको परवाह नगरी गरिएको सामूहिक सहयोगले विपद्को समयमा विदेशमा रहेका नेपालीको मातृभूमिप्रतिको सम्बन्ध र सामाजिक उत्तरदायित्वलाई पुनः उजागर गरेको संघले जनाएको छ ।
हालैको बाढीपहिरोबाट रसुवा, नुवाकोट, धादिङ, गोरखालगायत क्षेत्रमा जनधन तथा घर, सडक र अरू भौतिक संरचनामा क्षति पुगेको भन्दै एनआरएनए अस्ट्रेलियाले राहत र पुनर्स्थापनाका निम्ति सहयोग अभियान अघि बढाएको थियो ।
संकलित रकम अगस्ट २८ मा प्रधानमन्त्री दैवी प्रकोप उद्धार कोषमा अनलाइनमार्फत हस्तान्तरण गरिएको एनआरएनए अस्ट्रेलियाले जनाएको छ । अभियानबाट थप रकम प्राप्त भएमा त्यसलाई पनि उद्धार कोषमै पठाइने संघका कोषाध्यक्ष नीजन चौलागाईंले बताए ।
प्रतिक्रिया