अरुलाई होचो देखाएर आफू अग्लो हुइँदैन : काफ्ले

नेपाली कांग्रेसका नेता कुन्दनराज काफ्लेले एक कांग्रेसीले अर्को कांग्रेसीलाई होचो देखाएर आफू अग्लो हुनखोज्ने प्रवृत्तिले पार्टी कमजोर भएको टिप्पणी गरेका छन् । संस्थापन इतर समूहको भेलालाई सम्बोधन गर्दै काफ्लेले सभापति गगन थापालाई लक्षित गर्दै यस्तो अभिव्यक्ति दिएका हुन् ।

‘पहिला मेचीको कांग्रेसलाई दुख्दा महाकालीको कांग्रेसलाई दुख्थ्यो । त्यसैले कांग्रेस बलियो थियो,’ उनले भने, ‘आज एक कांग्रेसलाई पर्दा अर्को कांग्रेसले खुच्चिङ गर्ने संस्कृतिको विकास भएको छ । यो कसले गर्‍यो ?’

कांग्रेसले यसको चिन्तन गर्नुपर्ने बेला आएको उनले बताए ।

अहिले एउटा कांग्रेसलाई होचो देखाएर अर्को अग्लो हुनखोज्ने प्रवृत्ति रहेको पनि उनले बताए । ‘एउटालाई कमजोर देखाएर आफू बलियो हुनखोज्ने संस्कृति अहिले कांग्रेसको भाइरस हो । त्यो भाइरस १५ औं महाधिवेशनमा ठेगान लगाउनुपर्ने बेला छ,’ उनले भने ।