काठमाडौं । सिद्धार्थ प्रिमियर इन्स्योरेन्स लिमिटेडले भदौ १० गते भोटेकोशी नदीमा आएको विनाशकारी बाढीबाट बीमित सम्पत्तिमा भएको क्षतिको दाबी भुक्तानी सुरु गरेको छ।
कम्पनीले बाढीका कारण सम्पत्तिमा क्षति पुगेका बीमितलाई राहत पुग्ने गरी दाबी फर्छ्योट प्रक्रिया अघि बढाएको जनाएको छ। सोही क्रममा त्रिशुली बजारमा रहेको
शुली फेन्सी स्टोरमा बाढीका कारण सामान बगाएर भएको क्षतिबापत कम्पनीले ६४ लाख रुपैयाँ दाबी भुक्तानी गरेको हो।
बाढीका कारण पसलमा रहेका विभिन्न सामान बगेर तथा नष्ट भएर ठूलो क्षति पुगेपछि सम्बन्धित बीमितले कम्पनीसमक्ष दाबी पेश गरेका थिए। आवश्यक प्रक्रिया तथा क्षतिको मूल्यांकनपछि सिद्धार्थ प्रिमियर इन्स्योरेन्सले ६४ लाख रुपैयाँ भुक्तानी गरेको जनाएको छ।
भदौ १० गते भोटेकोशी नदीमा आएको बाढीले सिन्धुपाल्चोकलगायतका क्षेत्रमा ठूलो जनधन तथा भौतिक क्षति पुर्याएको थियो। बाढीका कारण व्यवसायिक प्रतिष्ठान, घर तथा विभिन्न संरचनासहित ठूलो परिमाणमा सम्पत्तिमा क्षति पुगेको थियो।
बीमा कम्पनीले प्राकृतिक विपत्तिका कारण बीमित सम्पत्तिमा भएको क्षतिको जोखिम न्यूनीकरणमा बीमाको महत्वपूर्ण भूमिका रहने बताउँदै दाबी प्रक्रिया सहज र प्रभावकारी बनाउँदै लैजाने जनाएको छ।
सिद्धार्थ प्रिमियर इन्स्योरेन्सले बाढीबाट प्रभावित अन्य बीमितका दाबीसमेत आवश्यक प्रक्रिया पूरा गरी क्रमशः फर्छ्योट गर्दै जाने जनाएको छ। कम्पनीका अनुसार विपद्का समयमा बीमितलाई समयमै क्षतिपूर्ति उपलब्ध गराउनु बीमा सेवाको महत्वपूर्ण दायित्व हो।
भोटेकोशी बाढीपछि प्रभावित क्षेत्रका व्यवसायी तथा सर्वसाधारणले आफ्नो सम्पत्तिमा भएको क्षतिको क्षतिपूर्ति प्राप्त गर्न बीमा कम्पनीसमक्ष दाबी पेश गरिरहेका छन्। सिद्धार्थ प्रिमियरको ६४ लाख रुपैयाँको भुक्तानीले विपद्बाट प्रभावित व्यवसायीलाई पुनः व्यवसाय सञ्चालनमा फर्किन सहयोग पुग्ने अपेक्षा गरिएको छ।
प्रतिक्रिया