काठमाडौं । वरिष्ठ मैथिली साहित्यकार डा. रेवतीरमण लालको निधन भएको छ । शनिबार साँझ जनकपुरधाको एक अस्पतालमा उपचारको क्रममा ८३ वर्षको उमेरमा उनको निधन भएको हो ।
मैथिली विषयमा पीएचडी गरेका डा. लाल नेपाल राष्ट्र बैंकको सेवाबाट अवकाशप्राप्त कर्मचारी थिए । उनले कथा, कविता, गीत, लेख, पटकथा, साक्षात्कार, यात्रा वृत्तान्त र लोकसाहित्यलगायत विभिन्न विधामा महत्वपूर्ण योगदान दिएका छन् । उनको पहिलो प्रकाशित मैथिली रचना ‘सरस्वती वन्दना’ गीत सन् १९६० मा प्रकाशित भएको थियो ।
उनका प्रमुख कृतिमा ‘साक्षात्कार’, ‘माधव नहि अएला मधुपुरसँ’, ‘हमर विदेश भ्रमण’, ‘महाकवि विद्यापति’ र ‘खिस्सा पिहानी’ रहेका छन् । उनी ‘विद्यापति’ सिरियलका रचयिता तथा मैथिली त्रैमासिक ‘नैमिकानन’का सम्पादकसमेत थिए ।
जनकपुरधाम उपमहानगरपालिका–११ स्थित निवासमा बस्दै आएका डा. लालको जन्म १९४३ मार्च २ मा धनुषाको साविक देवडिहा गाविस-३, खिरखिरिया गाउँमा भएको थियो ।
प्रतिक्रिया