रास्वपाको बेग रोकेर देखाउने पुरानालाई रविको चेतावनी

काठमाडौं । राष्ट्रिय स्वतन्त्र पार्टी(रास्वपा)का सभापति रवि लामिछानेले गिद्धले सिनो लुछेजस्तै लुछिएको देश अन्तिम सुनामीको तयारीमा रहेको बताएका छन् । मंगलबार सामाजिक सञ्जाल फेसबुकमा स्ट्याटस लेख्दै सभापति लामिछानेले यस्तो बताएका हुन् ।
आगामी निर्वाचनका लागि जो–जो मिलेपनि मिल्न आग्रह गर्दै भने,’ मेरो खुला आग्रह छ— खुला मिल वा गोप्य मिल, जस्तो र जसको गठबन्धन गर्नुपर्ने हो, गर। अन्तिम शक्ति लगाऊ र यो सुनामी रोकेर देखाऊ’ ।

निर्वाचन मार्फत आएको मत परिणाम स्वीकार्ने उल्लेख गर्दै जन विद्रोहले उखेलेर फालेको पुरानो संसद् षडयन्त्रपूर्ण ढङ्गले फर्काउने कुनै पनि चलखेल, दबाब र धम्की नस्विकार्ने उनले बताए ।
फागुन २१ कुनै सामान्य मिति नभई नेपाली इतिहासको माइलस्टोन हुने लामिछानेले बताए । फागुन २१ पछि आउने संसद्मा प्रतिपक्षी समेत नयाँ हुनुपर्ने उनले बताए ।
उनले भने,’फागुन २१ पछि आउने संसद्‌मा प्रतिपक्षी समेत नयाँ हुनुपर्छ । सर्प त एउटा पनि पाल्न सकिँदैन । यतिका वर्ष पूरा देश लुटेर बनाइएको आपराधिक गिरोहबाट अब यो देश सदाका लागि मुक्त हुनेछ। केही थान बिचौलियाहरूको मुठ्ठीमा कैद रहेको यस देशको भविष्य लेख्ने जिम्मा तपाईंको हातमा सुम्पिएका छौँ। मात्र तपाईँको हातमा।’