यस्ता छन्, कपाल फुल्नुका मुख्य र सहायक कारण (भिडियोसहित)

बुढेसकालमा कपाल फुल्नु सामान्य हो । तर, कतिपयको कपाल कम उमेरमै फुल्छ । कपाल फुल्नुलाई बुढ्यौलीको संकेतका रुपमा पनि लिइन्छ । हाम्रो समाजमा बुढ्यौलीको ट्यागबाट बच्न विभिन्न किसिमका मेहन्दीको प्रयोग गर्ने चलन छ ।
तर, कपाल फुल्नु बुढ्यौलीको संकेत होइन । कपाल फुल्नुका पछाडि विभिन्न कारण छन् । जुन हामीमध्ये धेरैलाई थाहा नहुन सक्छ । त्यसैले पनि मेहन्दीको प्रयोग बढेको हो ।
यस्तो किन हुन्छ ? उमेरै नपुगी कपाल फुल्नुका कारणहरू केके छन् ? कम उमेरमै कपाल फुल्नबाट बच्न केके गर्नुपर्छ ? र, कपालमा मेहन्दी लगाउँदा के हुन्छ ?

कपाल फुल्नुका सहायक कारण

एक अध्ययनका अनुसार ३० वर्षभन्दा अघि कपाल फुल्नु अस्वाभाविक मानिन्छ । तर, ३० वर्षभन्दा पछि कपाल फुल्नु स्वाभाविक हो ।

मेलानोसाइटिस तत्वका कारण कपाल कालो हुन्छ । हाम्रो शरीरमा यो तत्वको कमीका कारण कपाल फुल्छ । जबजब उमेर ढल्किँदै जान्छ मेलानोसाइटिसको उत्पादन घट्दै जान्छ । अनि कालो कपाल सेतोमा परिणत हुन्छ ।
तर, कहिलेकाहीँ उमेरै नपुगी शरीरमा मेलानोसाइटिस कम हुन्छ । जसकारण कम उमेरमै कपाल फुल्छ ।
त्यस्तै, दीर्घरोगी, धूम्रपान र मद्यपान गर्ने व्यक्ति, अत्यधिक जंकफुड खानेहरूको पनि उमेरै नपुगी कपाल फुल्ने गरेको पाइन्छ ।
त्यस्तै, औषधिको सेवन गर्ने, कपालमा जथाभावी रसायनिक पदार्थ वा हेयर प्रडक्टको प्रयोग गर्नेहरुको पनि कम उमेरमै कपाल फुलेको पाइन्छ ।

कपाल हर्मोनमा परिवर्तन, मानसिक तनाव तथा डिप्रेसन र वंशानुगत कारणले पनि उमेरमै कपाल फुल्छ ।
त्यसैगरी, मुटु, फोक्सो, मिर्गौला, पेटको समस्याजस्ता र मोटोपन भएका मानिसहरूको कपाल चाँडो फुल्न सक्ने बताइन्छ ।

कपाल फुल्ने मुख्य कारण
१. शाणुगत
उमेर नै नपुगी कपाल फुल्नुको कारणमध्ये वंशानुगत कारण एक हो । आमाबुवा वा परिवारका सदस्यको सानै उमेरमा कपाल फुल्ने समस्या भएमा छोराछोरीको पनि चाँडै कपाल फुल्न सक्छ ।

२. तनाव
तनाव विशेषगरी हाम्रो मानसिक स्वास्थ्यसँग जोडिएको हुन्छ । तर, यसले मानसिक स्वास्थ्यलाई मात्र नभएर हाम्रो कपाललाई पनि असर गरिरहेको हुन्छ । तनाव लिनेहरूको कपाल अरुको तुलनामा छिट्टै फुल्छ ।

३. भिटामिन बी १२ को कमी
कम उमेरमा सेतो कपाल हुनुका पछाडि भिटामिन ब १२ को कमी पनि हो । यस भिटामिनले हाम्रो शरीरमा महत्वपूर्ण भूमिका खेलेको हुन्छ । यसले शरीरलाई उर्जा दिनुको साथै कपालको वृद्धि र त्यसको रंगमा समेत योगदान गरेको हुन्छ । यसको अभावले कपालका कोषलाई कमजोर बनाउँछ ।

४. धुम्रपान
सेतो कपाल र धुम्रपान एकअर्काबीच अन्र्तसम्बन्धित छन् । धुम्रपानले फोक्सोको क्यान्सर, हृदयसम्बधी रोगमात्रै निम्त्याउँदैन । यसले कपाललाई पनि असर गरिरहेको हुन्छ । धूम्रपान, गुट्खा र मदिरा सेवनले कपाल चाँडो फुलाउँछ ।

कपालको विकासका लागि तरल पदार्थको सेवन

कपालको विकासका लागि शरीरमा अत्यधिक तरल पदार्थको आवश्यकता हुन्छ । के पिइन्छ र कति पिउने गरिएको छ भन्ने कुराले कपालमा असर पर्छ । कफी, चिया, रक्सी अधिक पिउँदा कपालको विकास रोकिन सक्छ र कम उमेरमा नै कपाल फुल्न सक्छ ।

समाधान के ?
१. कपाल रंग्याउने विभिन्न रसायनयुक्त प्रसाधन प्रयोग नगर्ने
२. सन्तुलित खानपानमा ध्यान दिने
३. शरीरमा भिटामिनडी को कमी हुन नदिने
४. कपाललाई प्रदुषणबाट बचाउने
५. गुणस्तरीय स्याम्पू तथा साबुनको प्रयोग गर्ने